අවි ආයුධ කිහිපයක් සහ ජීව උණ්ඩ තොගයක් සමඟ මත්ද්‍රව්‍ය ජාවාරම්කරුවන් බවට සැකකෙරෙන පුද්ගලයන් 10 දෙනෙකු අත්අඩංගුවට ගනු ලැබූ බව ගණේමුල්ල පොලීසිය සඳහන් කරයි.
ගණේමුල්ල පොලීසිය මඟින් සිදු කළ සෝදිසි මෙහෙයුමකදී කොස්සින්න, පරකන්දෙනිය ප්‍රදේශයේ නි‍ෙවසක සිටි සැක සහිත පුද්ගලයන් කිහිප දෙනෙකු අත්අඩංගුවට ගැනීමෙන් අනතුරුව සිදු කළ ප්‍රශ්න කිරීමේදී අනාවරණය වී ඇති තොරතුරු මත මොවුන්ට සම්බන්ධ තවත් පිරිසක් මීගමුව ප්‍රදේශයේදී අත්අඩංගුවට ගැනීමට හැකි වූ බව පොලීසිය පවසයි. මොවුන්ගෙන් සිදු කළ වැඩි දුර ප්‍රශ්න කිරීමේදී රිපීටර් වර්ගයේ ගිනි අවියක් සහ මිලිමීටර් 9 ප්‍රමාණයේ ගිනි අවියක්ද, කඩුවක්, ටී-56 ගිනිඅවි සඳහා භාවිත කරනු ලබන ජීව උණ්ඩ 183ක්, මිලිමීටර් 9 ජීව උණ්ඩ 290ක්, බෝර 12 ජීව උණ්ඩ 8ක්, පතරොම් ගැබ්, අත්මාංචු කුට්ටමක්, යුද හමුදා නිල ඇඳුම් කට්ටලයක්, ජංගම දුරකතන කිහිපයක්, අයිස් මත්ද්‍රව්‍ය මිලිග්‍රෑම් 240ක් සහ මත්පෙති තොගයක් අත්අඩංගුවට ගනු ලැබූ බවත් පොලීසිය කියයි.
මෙම සැකකරුවන් වනාතමුල්ල, රාජගිරිය, ඔබේසේකරපුර, දෙල්ගොඩ, මීගමුව, කටාන සහ කදිරාන යන ප්‍රදේශවල පදිංචි අවුරුදු 22 – 35 අතර වයසේ පසුවන්නවුන් බවත් අනාවරණය වී ඇත.
මේ සම්බන්ධයෙන් බස්නාහිර පළාත උතුර භාර නියෝජ්‍ය පොලිස්පති නිශාන්ත සොයිසා මහතාගේ උපදෙස් පරිදි ගම්පහ කොට්ඨාස භාර ජ්‍යෙෂ්ඨ පොලිස් අධිකාරි සනත් අමරසිංහ මහතාගේ අධීක්‍ෂණය මත ගණේමුල්ල පොලිස් ස්ථානාධිපති ප්‍රධාන පොලිස් පරීක්ෂක යූ.පී.එස්. ප්‍රියන්ත මහතාගේ මෙහෙයවීමෙන් වැඩිදුර විමර්ශන සිදු කෙරෙන අතර සැකකරුවන් ගම්පහ සහ මීගමුව මහේස්ත්‍රාත් අධිකරණ වෙත ඉදිරිපත් කිරීමට නියමිතව තිබිණි.