ආසියානු සංවර්ධන බැංකුව සමග අධ්‍යාපන අමාත්‍යාංශය එළඹ ඇති අවබෝධතා ගිවිසුම මත මේ වන විට ක්‍රියාත්මක ද්විතීයක අධ්‍යාපන ආංශික සංවර්ධන වැඩසටහන සඳහා ලබා දීමට නියමිත ව තිබූ ඉතිරි ණය වාරික ප්‍රමාණයෙන් මේ වනවිට ප්‍රතිඵල පාදක ව උපයාගෙන ඇති සියලු ණය වාරික 2025 වසරේ දෙසැම්බර් මස 31 වන විට ලබා දී අවසන් කරන බව ආසියානු සංවර්ධන බැංකුව විසින් මෙරටට දැනුම් දී ඇත.
2027 වර්ෂයේ දී නිල වශයෙන් ක්‍රියාත්මක කිරීමට අපේක්ෂිත නව ගුරු වෘත්තීය සංවර්ධන වැඩසටහන (Teacher Professional Development Program – TPDP) සඳහා ද ආසියානු සංවර්ධන බැංකුවේ ණය ආධාර වැඩසටහන යටතේ තාක්ෂණික හා මූල්‍ය සහාය දෙනු ලබන අතර 2025 වර්ෂයේ සැප්තැම්බර් මාසයේ දී ඒ වෙනුවෙන් තාක්ෂණික ආධාරක කණ්ඩායමක් මෙරටට පැමිණෙනු ඇත.
අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යතුමිය විසින් කරනු ලැබූ ඉල්ලීම මත යෝජිත නව අධ්‍යාපන ප්‍රතිසංස්කරණ මගින් සාක්ෂාත් කර ගැනීමට අපේක්ෂිත අරමුණු හෙවත් කුලුනු පහෙන් එකක් වන මානව සම්පත් සංවර්ධනය යටතේ අපේ ගුරු, විදුහල්පති, ගුරු අධ්‍යාපනඥ, ගුරු උපදේශක හා අධ්‍යාපන පරිපාලන යන සේවා පහේ ම වෘත්තීය සංවර්ධනය අරමුණු කරගත් වැඩසටහන් 2026 වර්ෂයේ නියමිත සැලසුම් තුළට අලුතින් අන්තර්ගත කිරීමට ද කටයුතු කර ඇත. ඒ අනුව මෙම වැඩසටහනේ සැලකිය යුතු වැඩ කොටසක් ඉදිරි වර්ෂය තුළ ම කරගත හැකි වනු ඇතැයි අපේක්ෂා කෙරේ.
මෙම වැඩසටහනට සමගාමී ව උසස් පෙළ විෂය නිර්දේශය සංවර්ධනයට අවශ්‍ය තාක්ෂණික හා මූල්‍ය සහාය ද ආසියානු සංවර්ධන ණය ආධාර යටතේ ලබා දීමට එකඟත්වය පළ කර ඇති අතර 2026 – 2030 කාල රාමුව තුළ සපුරාලනු ලබන සැලසුම්ගත ඉලක්ක මත පදනම් ව අවශ්‍ය පරිදි ඇමරිකානු ඩොලර් මිලියන100ක මුදල් ප්‍රතිපාදන අය-වැය සහායක ණය යෝජනා ක්‍රමයක් ලෙස සපයනු ඇත.