වසර 38කට පසු පාසල් ලීග් රග්බි කිරුළ දිනා ගැනීමට මහනුවර ත්‍රිත්ව විදුහල සමත් විය.
මෙවර තරගාවලියේ තරගයක් ඉතිරව තිබියදී අපරාජිතව කුසලානය කරා පැමිණි ත්‍රිත්ව විදුහල ඊයේ පැවති කුසලාන වටයේ අවසන් තරගයේදී සාන්ත පීතර විදුහල හමුවේ ලකුණු 22-20ක් ලෙස පරාජයට පත්වීම කැපී පෙනුණි.
ඩයලොග් ආසිආටා පීඑල්සී අනුග්‍රහයෙන් පැවති මේ තරගාවලියේදී ත්‍රිත්ව විදුහල ශූරතාව දිනා ගත්තේ 1987 වසරේදී ටයිරල් රාජපක්ෂගේ නායකත්වයෙන් යුත් සිය විදුහල් කණ්ඩායම විසින් ලබාගත් ජයග්‍රහණයෙන් අනතුරුවය. ස‍ෆ්රාස් උස්මාන් විසින් මෙහෙයවන ලද ජයග්‍රාහී ත්‍රිත්ව කණ්ඩායම ක්‍රීඩාවේ විනය, ශාරීරික යෝග්‍යතාව සහ කුසලතාව යන සියල්ල එක ලෙස මුසු වූ රග්බි සන්නාමයක් මෙහිදී ප්‍රදර්ශනය කිරීමට සමත් විණි. මූලික වටයේ අපරාජිතයන් ලෙස දෙවැනි වටයට පිවිසි රාජකීය පිල එහිදී ද ජයග්‍රාහී රිද්මය අඛණ්ඩව පවත්වාගත් මේ කණ්ඩායම
සාන්ත තෝමස් කණ්ඩායමට එරෙහිව ලකුණු 36-19ක් ලෙස ජය ගනිමින් කැනොන් ආර්.එස්. ද සේරම් කුසලාන හිමි කරගත් අතර, පසුගිය වසරේ පිළිමලුන් පිටුදැකීමේ තරගාවලියේ ශූරයන් වූ ඉසිපතන කණ්ඩායම ලකුණු 32-10කින් පරාජය කළේය. වෙස්ලි කණ්ඩායමට එරෙහිව තියුණු තරගයකින් පසු ලකුණු 23-21ක ජයක් සමඟ තවත් තරගයක් ඉතිරිව තිබියදී ලීග් කිරුළ දිනා ගැනීමට ත්‍රිත්ව ක්‍රීඩකයෝ සමත් වූහ.
මේ විශිෂ්ට ජයග්‍රහණ පසුපස කණ්ඩායමේ ප්‍රධාන පුහුණුකරු ලෙස කටයුතු කරන හිටපු ජාතික ක්‍රීඩක ෆසිල් මරීජා ඇතුළු කාර්ය මණ්ඩලය සිටියේය.
සාන්ත අන්තෝනියට
බඳුන ශූරතා
මේ අතර ඔමිත දිසානායකගේ නායකත්වයෙන් කටුගස්තොට සාන්ත අන්තෝනි කණ්ඩායම තවත් තරගයක් ඉතිරිව තිබියදීම බඳුන ශූරතාවට හිමිකම් කීමට සමත් විය.