ශ්‍රී ලංකා වෛද්‍ය සංගමය (SLMA), ශ්‍රී ලංකා විද්වත් වෘත්තීය සංගම් සංවිධානය (OPA) සමඟ සහයෝගයෙන්, පවත්වන්ට යෙදුන තිරසාර අනාගතයක් සඳහා කර්මාන්ත, දේශගුණය සහ සෞඛ්‍ය යන ත්‍රිත්ත්ව සම්බන්ධතාවයේ වැදගත්කම පිළිබඳ ඒකාබද්ධ සම්මන්ත්‍රණය ඊයේ (28) සෞඛ්‍ය හා ජනමාධ්‍ය නියෝජ්‍ය අමාත්‍ය වෛද්‍ය හංසක විඡේමුණි මහතාගේ ප්‍රධානත්වයෙන් ශ්‍රී ලංකා වෛද්‍ය සංගම් ශ්‍රවණාගාරයේ දී පැවැත්විණි.
සෞඛ්‍ය, කර්මාන්ත, ඉංජිනේරු විද්‍යාව, පාරිසරික විද්‍යාවන් සහ නාගරික සැලසුම්කරණය ඇතුළු සියලු ක්ෂේත්‍රවල වෘත්තිකයින් එක්රැස් කර තිරසාර හා සෞඛ්‍යයට හිතකර කාර්මික සංවර්ධනය සාකච්ඡා කිරීම සඳහා කාලෝචිත වේදිකාවක් සැපයීම මෙම සම්මන්ත්‍රණයේ අරමුණ වූ අතර, කාර්මික ක්‍රියාකාරකම් මගින් මෙහෙයවනු ලබන දේශගුණික විපර්යාසවල සෞඛ්‍යමය බලපෑම් ඉස්මතු කිරීම, තිරසාර කාර්මික පිළිවෙත් සඳහා හරස්-ආංශික සහයෝගීතාව ප්‍රවර්ධනය කිරීම, සෞඛ්‍ය අවදානම් අවම කිරීම සඳහා නියාමන සහ ප්‍රතිපත්තිමය පියවර හඳුනා ගැනීම, සෞඛ්‍ය සම්පන්න, සුවතාවයෙන් හෙඹි ශ්‍රී ලංකික ජනතාවක් සඳහා සාමූහික කැපවීම නැවත තහවුරු කිරීම යන කරුණූ පිළිබඳ මෙහිදි අවධානය යොමු කෙරිණි.
අපගේ කර්මාන්ත ආර්ථික වර්ධනයට, රැකියා සහ නවෝත්පාදනයට සහාය වුව ද මහජන සෞඛ්‍ය අර්බුද සඳහා ද සැලකිය යුතු දායකත්වයක් සපයන බව ද ශ්‍රී ලංකාව කාර්මීකරණය සහ ආර්ථික වර්ධනය කරා ගමන් කරන විට මෙම වර්ධනයන් දේශගුණයට සහ මහජන සෞඛ්‍යයට බලපෑම් කරන බව මෙහිදී සෞඛ්‍ය හා ජනමාධ්‍ය නියෝජ්‍ය අමාත්‍ය වෛද්‍ය හංසක විඡේමුණි මහතා අවධාරණය කරන ලදි.
වායු දූෂණය, තාප ආතතිය, ජල දූෂණය සහ අන්තරායකර අපද්‍රව්‍ය වැනි ගැටළු පාරිසරික හා මානව සෞඛ්‍ය යන දෙකටම බලපානු ලබන බව ද දේශගුණික විපර්යාස දුරස්ථ තර්ජනයක් නොවන බවත්, ඉහළ යන උෂ්ණත්වය, වායු හා ජල දූෂණය, ආන්තික කාලගුණික සිදුවීම් සහ වාහකයින් මගින් බෝවන රෝග පැතිරීම ප්‍රජාවන්හි සෞඛ්‍ය අවදානමට හේතු සාධක වී ඇති බව ද පෙන්වා දෙන ලදි.
අපගේ සෞඛ්‍ය පද්ධති පාරිසරික බලපෑම් සහ කාර්මික භාවිතයන් යන දෙයාකාරයෙන් ම පීඩාවට පත්ව ඇති බවත්, එය දූෂිත වාතය නිසා ඇතිවන ශ්වසන රෝගවල සිට දේශගුණික විපර්යාස හේතුවෙන් ඇතිවන මානසික සෞඛ්‍ය ප්‍රතිවිපාක දක්වා ව්‍යාප්ත බව ද නියෝජ්‍ය අමාත්‍යවරයා පැවසී ය.
පිරිසිදු බලශක්ති සංක්‍රාන්ති මගින් විමෝචනය අඩු කර වායු දූෂණය අඩු කළ හැකි බවත් තිරසාර කාර්මික භාවිතයන් මගින් පරිසර පද්ධති සහ මහජන සෞඛ්‍යය යන දෙකම ආරක්ෂා කළ හැකි බව ද පෙන්වා දුන් නියෝජ්‍ය අමාත්‍යවරයා ඔරොත්තු දෙන සෞඛ්‍ය සේවා පද්ධති ගොඩනැගීමේ අවශ්‍යතාවය ද මෙහිදී පෙන්වා දෙන ලදි.
ආරක්ෂිත පරිසරයක්, ආර්ථිකයක්, ශක්තිමත් සෞඛ්‍ය සම්පන්න ජනගහණයක් නිර්මාණය කිරීමට කැප වන බවත්, මෙම ත්‍රිත්ව සම්බන්ධතාවය ඵලදායී ලෙස යොදා ගැනීමට දේශපාලනඥයින්, ව්‍යාපාරිකයින්, විද්‍යාඥයින් සහ ප්‍රජාවන් හුදකලාව නොව සහයෝගීතාවයෙන් ක්‍රියා කළ යුතු බව ද පෙන්වා දෙන ලදි. එමෙන්ම කර්මාන්ත අපගේ දේශගුණයට සහ සෞඛ්‍යයට තර්ජනයක් ලෙස නොව පරිවර්තනය සඳහා බලවත් මෙවලමක් බව ද වැඩිදුරටත් පැවැසී ය.
ශ්‍රී ලංකා වෛද්‍ය සංගමය ශ්‍රී ලංකාවේ ප්‍රමුඛතම වෛද්‍ය වෘත්තීය සංවිධානය ලෙස සායනික විශේෂඥතාවයේ ආරක්ෂකයින් පමණක් ලෙස නොව, මහජන සෞඛ්‍ය සේවා ස්ථාන යහපැවැත්ම සහ සෞඛ්‍යයේ පුළුල් නිර්ණායකයන්ගේ ආරක්ෂකයින් ද ලෙස ද විවිධ කර්මාන්ත හරහා සේවා ස්ථාන සෞඛ්‍ය ප්‍රවර්ධන මාර්ගෝපදේශ ක්‍රියාත්මක කිරීම, වෘත්තීය සෞඛ්‍ය පරීක්ෂණ සහ බෝ නොවන රෝග අවදානම් තක්සේරු කිරීම් සඳහා සහාය වීම, මානසික සෞඛ්‍යය පිළිබඳ දැනුවත්භාවය ප්‍රවර්ධනය කිරීම සහ ආතති කළමනාකරණ සහාය ලබා දීම, සෞඛ්‍ය සම්පන්න ආපනශාලා ප්‍රතිපත්ති, ක්‍රියාකාරී ප්‍රවාහන විකල්ප සහ දුම්කොළ රහිත සේවා ස්ථාන ප්‍රවර්ධනය කිරිම, මානව සම්පත් කළමනාකරුවන් සහ සේවා ස්ථාන සුවතා නිලධාරීන් සඳහා ධාරිතා වර්ධනය සැපයීම සඳහා දායකත්වය දෙන බව ශ්‍රී ලංකා වෛද්‍ය සංගමයේ සභාපති වෛද්‍ය සුරන්ත පෙරේරා මහතා මෙහිදී අවධාරණය කරන ලදි.
එමෙන්ම 21 වන සියවසේ සංකීර්ණ සෞඛ්‍ය හා ආර්ථික අභියෝගවලට මුහුණ දෙන විට ඉතා වැදගත් තේමාවක් ලෙස කර්මාන්තවල යහපැවැත්ම පෙන්වා දිය හැකි බවත් ඒ් මහතා පැවසීය.
සෞඛ්‍ය හා ජනමාධ්‍ය අමාත්‍යාංශයේ මූලිකත්වයෙන් විශේෂඥ වෛද්‍යවරුන්ගේ සංගම් රැසක් සමග සමීපව කටයුතු කරමින් ඉදිරි වසර 05 තුළ ප්‍රජාව මූලික කරගත් සෞඛ්‍ය ප්‍රවර්ධන කටයුතු සිදු කිරීමට සැළසුම් කර ඇති බව ද ශ්‍රී ලංකා වෛද්‍ය සංගමයේ සභාපති වෛද්‍ය සුරන්ත පෙරේරා මහතා මෙහිදී පැවැසී ය.
මෙහිදී සුවතාවය වැඩිදියුණු කරළීමේ අදහසින් ශ්‍රී ලංකා වෛද්‍ය සංගමයේ (SLMA) මූලිකත්වයෙන් මෙරට සහ වයස අවුරුදු 50 සම්පූර්ණ කරන සෑම වෘත්තිකයෙකුටම සහ සෑම පුරවැසියෙකුටම “ඔබේ සෞඛ්‍යය ඔබේ ධනයයි – ඔබේ ජාතියේ ද ධනයයි” යන ජාතික පණිවිඩය සමඟ සුබ පැතුම් එක් කරමින් සුබ පැතුම් කාඩ් පතක් ඉදිරියේ දි නිකුත් කිරීමට නියමිතය.
මෙම සුවතා උපන්දින කාඩ්පත හදුන්වාදීම ද මෙහිදී සිදු වූ අතර, එම සුබපැතුම් පතින් තවදුරටත් නිරෝගීමත්ව ජිවිතය ගත කිරීම සඳහා සෞඛ්‍යමය උපදෙස් හා පණිවුඩ ද ලබාදෙනු ලබයි.
ශ්‍රී ලංකාවේ, හෘද රෝග, දියවැඩියාව, අධි රුධිර පීඩනය සහ මානසික සෞඛ්‍ය ආබාධ ඇතුළු බෝ නොවන රෝග (NCDs) වැඩිවීම මෙරට ශ්‍රම බලකායට පැහැදිලි සහ ක්ෂණික තර්ජනයක් එල්ල කරයි. ශ්‍රී ලංකාවේ සිදුවන සියලුම මරණ වලින් 80% කට වඩා බෝ නොවන රෝග නිසා සිදුවන අතර, මෙම රෝග බොහොමයක් රැකියා ස්ථානයේ ආරම්භ වන, නරක අතට හැරෙන හෝ තීව්‍ර වන වෙනස් කළ හැකි ජීවන රටා අවදානම් මගින් මෙහෙයවනු ලැබේ. දුර්වල පෝෂණය, ශාරීරික ක්‍රියාකාරකම් නොමැතිකම, දුම්කොළ භාවිතය, මත්පැන් පානය සහ ආතතිය ඊට හේතු සාධක වේ.
මෙම අවස්ථාවට ශ්‍රී ලංකා වෛද්‍ය සංගමයේ සභාපති වෛද්‍ය සුරන්ත පෙරේරා, උප සභාපතිවරුන් වන වෛද්‍ය මනිල්ක සුමනතිලක සහ වෛද්‍ය සුසී පෙරේරා, සහකාර ලේකම් වෛද්‍ය ඉෂාණි ප්‍රනාන්දු, ශ්‍රී ලංකා විද්වත් වෘත්තීය සංගම් සංවිධානයේ සභාපති සුජීව ලාල් දසනායක, මොරටුව විශ්ව විද්‍යාලයේ ඉංජිනේරු පීඨයේ ඉංජින්රු විද්‍යාව සහ රසායනික ක්‍රියාවලි පිළිබඳ ඡ්‍යෙෂ්ඨ මහාචාර්ය අජිත් ද අල්විස්, වෛද්‍ය වෘත්තිකයන්, ඉංජිනේරුවන්, පරිසර විද්‍යාඥයින්, ප්‍රතිපත්ති සම්පාදකයින්, මහජන සෞඛ්‍ය නිලධාරීන්, ආයතනික තිරසාරභාවය පිළිබඳ නායකයින් සහ වෘත්තීය සංගම්වල සාමාජිකයින් ඇතුළු විද්වතුන් පිරිසක් එක්ව සිටියහ.