ජාත්‍යන්තර මූල්‍ය අරමුදලේ පළමු නියෝජ්‍ය කළමනාකාර අධ්‍යක්ෂිකාව ලෙස කටයුතු කළ ආචාර්ය ගීතා ගෝපිනාත් සිය ධුරයෙන් ඉවත්වීමට නියමිත බව විදෙස් මාධ්‍ය වාර්තා කරයි. නිවේදනයක් නිකුත් කරමින් ජාත්‍යන්තර මූල්‍ය අරමුදලේ කළමනාකාර අධ්‍යක්ෂිකා ක්‍රිස්ටලිනා ජෝර්ජිවා ප්‍රකාශ කර ඇත්තේ ඇය හාවඩ් විශ්වවිද්‍යාලයේ ආර්ථික දෙපාර්තමේන්තුවේ මහාචාර්යවරිය ලෙස වැඩ භාර ගැනීමට නියමිත බවය. වසර 2019 ජනවාරියේදී ප්‍රධාන ආර්ථික විද්‍යාඥවරිය ලෙස ජාත්‍යන්තර මුල්‍ය අරමුදලට එක්වීමට පෙර ඇය හාවර්ඩ් විශ්වවිද්‍යාලයේ සේවය කළ බව ද වාර්තා වේ.
2022 වසරේ ජනවාරියේදී ජාත්‍යන්තර මූල්‍ය අරමුදලේ පළමු නියෝජ්‍ය කළමනාකාර අධ්‍යක්ෂිකාව ලෙස උසස්වීමක් ලැබූ ඇය අමෙරිකාවේ පුරවැසිභාවය හිමි ඉන්දීය ජාතිකයකු වේ. මේ වන විට 53 හැවිරිදි ගීතා ගෝපිනාත් ලබන අගෝස්තු මස අවසානයේදී ජාත්‍යන්තර මූල්‍ය අරමුදලෙන් නිල වශයෙන් ඉවත්වීමට නියමිත බව වාර්තා වේ. ඇය වෙනුවට ඉදිරියේදී ක්‍රිස්ටලිනා ජෝර්ජිවා විසින් නව නියෝජ්‍ය අධ්‍යක්ෂවරයකු පත් කිරිමට නියමිත ජාත්‍යන්තර මූල්‍ය අරමුදල නිකුත් කළ නිවේදනයේ වැඩිදුරටත් සඳහන් වේ.