ශ්‍රී ලංකා ක්‍රිකට් ලීග් විස්සයි20 තරගාවලියේදී ‘බ්ලූස්’ කණ්ඩායමට ක්‍රීඩා කරන පිතිකරු කුසල් ජනිත් පෙරේරාගේ වම් අතේ ඇඟිලි අතරට වේග පන්දුවක් වැදී වේදනා බරව ඇද වැටී සිටියදී හෙද කාර්ය මණ්ඩලය ඔහුව පිටියෙන් ඉවත් කොට වහාම රෝහල්ගත කොට ‘ස්කෑන්’ පරීක්ෂණයකට යොමු කළේය. එම ස්කෑන් පරීක්ෂණයේ ප්‍රතිඵලය අනුව ඔහුට අවශ්‍ය ප්‍රතිකාර ලබාදීමට නියමිත අතර, ඉදිරි ක්‍රීඩා කටයුතු ද එම ප්‍රතිඵල මත තීරණය වේ.
දකුණතින් වේග පන්දු යවන ප්‍රමෝද් මධුෂාන්ගේ ‘ෆුල්ටොස්’ පන්දුවක් කෙළින්ම පැමිණ කුසල් ජනිත්ගේ වම් අතේ ඇඟිලි මත වැදී මේ ආබාධය සිදුවූ අතර, එවිට ඔහු පන්දු 6කට මුහුණදී ලකුණු 6ක් ලබා සිටියේය. කොළඹ එස්එස්සී පිටියේ ඊයේ පැවති තරගයේදී මේ අනතුර සිදු විය.
ඉදිරියේදී පැවැත්වෙන සිම්බාබ්වේ සංචාරය හා ආසියානු කුසලාන ක්‍රිකට් තරගාවලිය ඉලක්ක කොට ක්‍රීඩකයන්ගේ දක්ෂතා මැන බැලීම වෙනුවෙන් මේ ශ්‍රී ලංකා ක්‍රිකට් ලීග් විස්සයි20 තරගාවලිය සංවිධාන කොට ඇත.