බැංකු ගිණුමකින් මුදල් වංචා කිරීමක් සම්බන්ධයෙන් සැකකරුවන් සිව් දෙනෙකු අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබෙනවා.
බැංකු ගිණුමක තිබූ රුපියල් 569,610.00 (පන් ලක්ෂ හැටනව දහස් හයසිය දහය) ක මුදලක් වංචා කිරීම සම්බන්ධව 2024.05.29 වන දින අපරාධ පරීක්ෂණ දෙපාර්තමේන්තුවේ වයඹ පළාත් පරිගණක අපරාධ විමර්ශන අංශය වෙත ලැබී පැමිණිල්ලක් මත එම ඒකකය මඟින් විමර්ශන ආරම්භ කර තිබුණා.
ඒ අනුව ඊ‍යේ (14) දින විමර්ශන නිලධාරින් විසින් ඉහත පැමිණිල්ලට අදාලව මුදල් වංචා කිරීම, සාවද්‍ය පරිහරණය හා විශ්වාසය කඩකිරීම යන චෝදනාවලට සම්බන්ධ සැකකරුවෙකු හා ඊට ආධාර අනුබල දුන් සැකකරුවන් තිදෙනෙකු මුරුතලාව ප්‍රදේශයේදී අත්අඩංගුවට ගෙන ඇත.
අත්අඩංගුවට ගත් සැකකරුවන් අවුරුදු 30 සහ 38 වයස්වල පසුවන දෙහිදෙණිය, මුරුතලාව ප්‍රදේශයේ පදිංචිකරුවන්.
වෙබ් අඩවියක පළ කර තිබූ ජල මෝටරයක් විකිණීමට අදාල දැන්වීමක් අනුව සැකකරුවන් විසින් එය මිලදී ගන්නා බවට හඟවමින් විකුණුම්කරුට අත්තිකාරම් මුදලක් තැන්පත් කරන මුවාවෙන් ඔහුගේ බැංකු ගිණුමට සම්බන්ධිත OTP අංකය ලබාගෙන මෙම මුදල් වංචා කිරීම සිදුකර ඇති බවට දැනට සිදු කරන ලද විමර්ශයේදී අනාවරණය වී ඇත.
සැකකරුවන් අද (15 ) දින වාරියපොල ගරු මහේස්ත්‍රාත් අධිකරණය වෙත ඉදිරිපත් කිරීමට නියමිතව ඇති අතර අපරාධ පරීක්ෂණ දෙපාර්තමේන්තුවේ වයඹ පළාත් ඒකකයේ පරිගණක අපරාධ විමර්ශන අංශය වැඩිදුර විමර්ශන සිදුකරනු ලබයි.