ලෝක සමාජ මාධ්‍ය දිනය අදට (30) යෙදී තිබෙනවා.
නව මාධ්‍ය ප්‍රවනතා ඔස්සේ මේ වනවිට සමාජ මාධ්‍ය සමාජ කණ්ඩායම්වල මූලික අංගයක් බවට පත්වී තිබෙන අතර, තොරතුරු සම්පාදනය, විනෝදාස්වාදය යන මුඛ්‍ය සන්නිවේදන අවශ්‍යතා අතික්‍රමණය කරමින් මේ වනවිට සමාජ මාධ්‍ය ප්‍රබල ජනමතයක් ගොඩනඟා තිබීමද විශේෂත්වයක්.
සමාජ මාධ්‍ය ඇරඹුම පරිගණකය, මෙන්ම ස්මාර්ට් දුරකථනය ඔස්සේ සංකීර්ණත්වයට පත්ව ඇති අතර 2002 වසරේදි Friendster, 2003 වසරේදි MySpace ආරම්භ වීම සහ 2004 වසරේදී ෆේස්බුක් ආරම්භ වීමත් සමග තාක්ෂණික ගමන් මඟ ඔස්සේ විවිධාකාර සමාජ මාධ්‍ය මෘදුකාංග හා යෙදවුම් නිමැවුමටත් ඒ ඔස්සේ ලෝකයම එකම ස්ථානයකට එකතු වීමට අවස්ථාව උදාවුණි.
ලෝකයේ මහාද්වීප යා කරමින් අති විශාල සමාජ මාධ්‍ය ජාල රාශියක් ක්‍රියාත්මක වන අතර, ෆේස්බුක්, යූටියුබ්, ඉන්ස්ටර්ග්‍රෑම්, ටික් ටොක් වැනි සන්නිවේදන මෙවලම් මේ වනවිට ලෝකයේ සෑම සමාජ ස්ථරයක්ම නියෝජනය කරනු ලබයි.
වර්තමානය වන විට ලෝකයේ මාධ්‍ය සමාජය හසුරුවන ප්‍රධානතම සන්නිවේදන මෙවලම ලෙස සමාජ මාධ්‍යය ප්‍රමුඛ ස්ථානයට පැමිණ ඇත.
ලෝකයේ දැවැන්ත වෙනසක් සිදුකිරීමට සහ ලෝකයම එක් ස්ථානයකට එක් කිරීමට සමාජ මාධ්‍ය ඉවහල් වී තිබීම විශේෂත්වයක්.
මානව මතවාද ගොඩනගන සහ මානව මතවාද ඝට්ඨනය කරනු ලබන බොහෝ අරපරිස්සමෙන් භාවිතා කළ යුතු මෙවලමක් බවට අද වනවිට සමාජ මාධ්‍ය පත්ව ඇත.
