ශ්‍රී ලංකාවට එරෙහිව හරාරේහිදී පැවති එක්දින තරග දෙකේදී නොදැවී ලකුණු 59ක් සහ ලකුණු 92ක් ලබාගත් සිම්බාබ්වේ කණ්ඩායමේ තුන් ඉරියව් ක්‍රීඩක සිකන්දර් රාසා සිය වෘත්තීය ජීවිතයේ පළමු වරට අයිසීසී එක්දින තුන් ඉරියව් ක්‍රීඩක ශ්‍රේණිගත කිරීම්වල ඉහළටම පැමිණෙයි.
39 හැවිරිදි ඔහු තරග දෙකේදී ලකුණු 151ක් රැස් කළ අතර, පන්දු යැවීමේදී එක් කඩුල්ලක් දවා ගනිමින් ඇෆ්ගනිස්තානයේ අස්මතුල්ලා ඔමාර්සායි සහ මොහොමඩ් නබි අබිබවා ගියේය. රාසාගේ මේ දක්ෂතාව හේතුවෙන් ඔහු එක්දින පිතිකරණ ශ්‍රේණිගත කිරීම්වල ස්ථාන නවයක් ඉහළට පැමිණ 22 වැනි ස්ථානයට පත් වූ අතර, මෙයට පෙර ඔහු 2023 ජුනි මාසයේදී 24 වැනි ස්ථානයේ සිටියේය.
ලකුණු 198ක් ලබා තරගාවලියේ වීරයා ලෙස සම්මාන දිනූ ශ්‍රී ලංකා ආරම්භක පිතිකරු පැතුම් නිස්සංක ස්ථාන හතක් ඉදිරියට පැමිණ එක්දින පිතිකරුවන් අතර 13 වැනි ස්ථානයට පත්වූ අතර, ජනිත් ලියනගේ ස්ථාන 13ක් ඉදිරියට පැමිණ 29 වැනි ස්ථානයට පැමිණියේය.
දකුණු අප්‍රිකානු දඟ පන්දු යවන ක්‍රීඩක කේෂව් මහරාජ්, ශ්‍රී ලංකා දඟ පන්දු යවන ක්‍රීඩක මහීෂ් තීක්ෂණ අබිබවා එක්දින පන්දු යවන්නන් අතර අංක 1 ස්ථානය ලබාගත් අතර, අසිත ප්‍රනාන්දු ස්ථාන හයක් ඉදිරියට පැමිණ 31 වැනි ස්ථානය දක්වා හා ඩිල්ෂාන් මධුශංක 60 වැනි ස්ථානයේ සිට 52 වැනි ස්ථානය දක්වා ඉහළට පැමිණියේය.