එක්සත් අරාබි එමීර් රාජ්යය ඔපෙක් සංවිධානයෙන් ඉවත් වීමට ගත් තීරණය ගෝලීය බලශක්ති දේශපාලනයේ සහ ආර්ථිකයේ තීරණාත්මක හැරවුම් ලක්ෂ්යයක් සනිටුහන් කරන බව ආර්ථික විශේෂඥයින් පෙන්වා දෙනවා.
දශක පහකට වැඩි කාලයක් පුරා තෙල් මිල පාලනය කළ මෙම සංවිධානයෙන් ඉවත් වීම හරහා එමීර් රාජ්යය සිය දෛනික තෙල් නිෂ්පාදනය කැපී පෙනෙන ලෙස ඉහළ නැංවීමට සූදානම් වන බව වාර්තා වනවා.
මෙම තීරණය මැදපෙරදිග කලාපීය දේශපාලන සබඳතා මෙන්ම අනාගත ලෝක තෙල් වෙළඳපොළේ ස්ථාවරත්වය කෙරෙහිද දැඩි බලපෑමක් එල්ල කරන බව විචාරකයින් පවසනවා.
ලෝකයේ ප්රධානතම තෙල් අපනයනය කරන රටවල් එක්ව 1970 දශකයේ සිට ගෝලීය බලශක්ති ප්රතිපත්තිය මෙහෙයවනු ලැබුවේ ඔපෙක් සංවිධානය හරහා බව පෙනී යනවා.
විශේෂයෙන්ම තෙල් නිෂ්පාදන කෝටාවන් පනවමින් වෙළඳපොළ මිල පාලනය කිරීමට ඔවුන් කටයුතු කළද, එම සීමාවන් නිසා සිය ආදායම අහිමි වන බව එක්සත් අරාබි එමීර් රාජ්යය දිගු කලක සිට විශ්වාස කරනවා.
වර්තමානය වන විට දෛනිකව තෙල් බැරල් මිලියන තුනක පමණ සීමාවක රැඳී සිටින එමීර් රාජ්යය, සිය නිෂ්පාදන ධාරිතාව බැරල් මිලියන පහ දක්වා ඉහළ නැංවීමේ අරමුණින් මෙම තීරණය ගෙන තිබෙනවා.
මෙය සෞදි අරාබිය සහ එක්සත් අරාබි එමීර් රාජ්යය අතර පවතින රාජ්ය තාන්ත්රික සබඳතාවලට යම් බලපෑමක් එල්ල කළ හැකි බවද සඳහන් වනවා.
