වෙන්නප්පුව වැවපාර ප්‍රදේශයේ අද උදේ සිදුවූ වෙඩි තැබීමකින් පුද්ගලයෙකු මියගොස් තිබෙනවා.
මෝටර් රථයකින් පැමිණි තිදෙනෙකු විසින් යතුරුපැදියකින් ගමන් කරමින් සිටි දෙදෙනෙකුට තියුණු ආයුධයකින් පහරදී, අනතුරුව වෙඩි තබා ඇති බවයි වාර්තා වන්නේ. වෙඩි තැබූ පුද්ගලයා අත්අඩංගුවට ගෙන තිබෙනවා.
මෙම සිද්ධියෙන් ඝාතනයට ලක්ව ඇත්තේ ලුණුවිල කිරිමැටියාන ප්‍රදේශයේ පදිංචිව සිටි ධනුෂ්ක උදයකාන්ත නමැති අයෙක්.
යතුරුපැදියේ සිටි අනෙක් පුද්ගලයාටද තුවාල සිදුවී ඇති අතර, ඔහු දිවගොස් දිවි ගලවාගෙන තිබෙනවා.
ඔහු මේ වන විට රෝහල් ගත කර ඇති බවද පොලීසිය සදහන් කළා.
ඝාතකයින් පැමිණි මෝටර් රථය, වෙඩි තැබීමට යොදාගත් රිවෝල්වරය සහ පහර දුන් කඩුව පොලිස් බාරයට ගෙන තිබෙනවා.
වෙඩි තැබීම සිදු කර පලාගිය සෙසු සැකකරුවන් දෙදෙනා සොයා විශේෂ පොලිස් මෙහෙයුමක් ක්‍රියාත්මකයි.
පොලීසිය ප්‍රකාශ කළේ, ඔවුන් වෙන්නප්පුව සහ අවට ප්‍රදේශවල පදිංචිකරුවන් බවයි.
2014 වසරේ සිදුවූ මනුෂ්‍ය ඝාතනයකට පළිගැනීමක් ලෙස මෙම ප්‍රහාරය සිදු කර ඇති බවට අනාවරණය වී තිබෙනවා.
ඝාතනයට ලක්වූ පුද්ගලයා මහාධිකරණයේ විභාගවන නඩුවකට අදාළව වෙන්නප්පුව පොලීසියේ අත්සන් තැබීමට පැමිණ, ආපසු යමින් සිටි අවස්ථාවේ වෙඩි ප්‍රහාරය එල්ල වී ඇති බවයි වාර්තා වනන්නේ.