අයර්ලන්ත ක්‍රීඩක කර්ටිස් කැම්පර් වෘත්තීය ක්‍රිකට් තරගයකදී පිට පිට පන්දු 5කින් කඩුලු 5ක් බිඳ දැමූ ලොව පළමු ක්‍රිකට් ක්‍රීඩකයා ලෙස වාර්තා පොතට එක් වෙයි.
ඩබ්ලින්හිදී පැවති අන්තර් පළාත් විස්සයි20 තරගාවලියේදී කැම්පර් මේ දස්කම කළේ නොර්ත් වෙස්ට් වොරියර්ස් කණ්ඩායමට එරෙහිවය.
මන්ස්ටර් රෙඩ්ස් කණ්ඩායම නියෝජනය කරන 26 හැවිරිදි කැම්පර් ඉනිමේ 12 වැනි ඕවරයේ 5 වැනි පන්දුවෙන් සිය කඩුලු දඩයම ආරම්භ කළ අතර, අවසන් පන්දුවෙන්ද කඩුල්ලක් බිඳ දැමීමට සමත් විය. අනතුරුව ක්‍රියාත්මක කළ 14 වැනි ඕවරයේ පළමු පන්දුවෙන් සිය කඩුලු ත්‍රිත්වය සපුරාගත් කැප්ම්පර් ඊළඟ පන්දු ද්විත්වයෙන් කඩුලු 2ක් බිඳ දැමීමත් සමඟ නෝර්ත් වෙස්ට් ඉනිම ලකුණු 88කින් නිමා විය. කෙසේ වෙතත් ඕවර 2.3ක් යැවූ කැම්පර් ලකුණු 16ක් ලබාදී තිබිණි.
කෙසේ වෙතත් කැම්පර්ට පෙර පසුගිය වසරේ සිම්බාබ්වේ පැවති 19න් පහළ දේශීය විස්සයි20 කාන්තා තරගාවලියේදී ඊගල්ස් කණ්ඩායමට එරෙහිව පිට පිට කඩුලු 5ක් දවා ගැනීමට සිම්බාබ්වේ කාන්තා තුන් ඉරියව් ක්‍රීඩිකා කෙලිස් නද්ලොවුට සමත්ව තිබේ.
ජාත්‍යන්තර ක්‍රිකට් පිටියේ පිට පිට පන්දු 4කින් කඩුලු 4ක් බිඳ දැමූවන්ගේ ලැයිස්තුවට කැම්පර් එක්ව සිටින අතර, ඇෆ්ගනිස්තානයේ රිෂාඩ් ඛාන්, ශ්‍රී ලංකාවේ ලසිත් මාලිංග, කොදෙව්හි ජේසන් හෝල්ඩර්ට අමතරව ලේසෝතේ රාජ්‍යයේ සහ ආර්ජන්ටිනාවේ ක්‍රීඩකයෙක් බැගින් ද මේ ලැයිස්තුවට එක්ව සිටිති.