අමෙරිකානු ජනාධිපති ඩොනල්ඩ් ට්‍රම්ප් විසින් පනවන ලද බොහෝ ගෝලීය තීරු බදු නීතිවිරෝධී බවට එරට අභියාචනාධිකරණයක් තීන්දු කර තිබෙනවා. එමගින් ජනාධිපති ට්‍රම්ප්ගේ විදේශ ප්‍රතිපත්ති න්‍යායපත්‍රයට බාධා එල්ල විය හැකි නීතිමය ගැටුමක් ඇති කරන බවයි, එම අධිකරණය පෙන්වා දෙන්නේ.
අමෙරිකානු අභියාචනාධිකරණය විසින් ලබා දුන් මෙම තීන්දුව ජනාධිපති ඩොනල්ඩ් ට්‍රම්ප් ලොවපුරා බොහෝ රටවල් මත පනවා ඇති අන්‍යෝන්‍ය තීරු බදුවලට මෙන්ම, චීනය, මෙක්සිකෝව සහ කැනඩාව මත පනවා ඇති අනෙකුත් තීරු බදුවලට ද බලපානු ඇති බව, විදෙස් මාධ්‍ය වාර්තා සඳහන් කරනවා.
එරට හදිසි ආර්ථික බලතල පනතක් යටතේ තීරු බදු පැනවීම සඳහා අවසර හිමි වී ඇති බවට ජනාධිපති ට්‍රම්ප් ඉදිරිපත් කළ තර්කය ප්‍රතික්ෂේප කරන බවත්, එම තීරු බදු නීතියට පටහැනි බැවින් වලංගු නොවන බවත්, අමෙරිකානු අභියාචනාධිකරණය මෙහිදී කියා සිටියා. මෙම තීන්දුවට අදාළව නඩුව, විභාග කරන ලෙසට එරට ශ්‍රේෂ්ඨාධිකරණයෙන් ඉල්ලා සිටීම සඳහා ට්‍රම්ප් පරිපාලනයට අවස්ථාව ලබා දෙමින් එළඹෙන ඔක්තෝබර් 14 වැනිදා දක්වා සිය තීන්දුව ක්‍රියාත්මක නොකරන බව ද එම අධිකරණය සඳහන් කළා.
අමෙරිකානු අභියාචනාධිකරණයේ තීන්දුව විවේචනයට ලක් කරමින් ජනාධිපති ට්‍රම්ප් සිය ටෘත් සමාජ මාධ්‍ය ගිණුමෙහි සටහන් කර සිටියේ, පනවන ලද තීරු බදු ඉවත් කළ හොත්, අමෙරිකාව මූල්‍යමය අර්බුදයකට ලක් කරමින් ව්‍යසනයකට මුහුණ පෑමකට සිදු වනු ඇති බවයි.
මේ අතර, වෙළෙඳ අසමතුලිතතාවක් පැවතීම අමෙරිකාවේ ජාතික ආරක්ෂාවට හානිදායක බව පවසමින් ජනාධිපති ට්‍රම්ප් වෙළෙඳාම පිළිබඳ ජාතික හදිසි තත්වයක් ප්‍රකාශයට පත් කර තිබෙනවා. තීරු බදු පැනවීම, අමෙරිකානු ජනාධිපතිවරයාගේ බලතලවලට අයත් නොවන බවත්, බදු පැනවීම මූලිකවම එරට කොංග්‍රසයේ බලතලවලට යටත්වන්නක් බවත්, අමෙරිකානු අභියාචනාධිකරණය කියා සිටියා.
