ප්‍රබල පාතාල කල්ලි නායකයෙකු බව කියන ගනේමුල්ල සංජීව ඝාතනය කිරීමේ ක්‍රියාදාමය පසුපස ප්‍රබල සංවිධානාත්මක අපරාධකරුවන් 09 දෙනෙකු සම්බන්ධ වී ඇති බවත් ඉන් 04 දෙනෙකු විදේශ වලට පලා ගොස් සැඟවී සිටින බවට තොරතුරු ලැබී තිබෙන බවත් කොළඹ අපරාධ කොට්ඨාශය අද කොළඹ මහේස්ත්‍රාත් අධිකරණයට දැනුම් දුන්නා.
මෙම ඝාතනයට සංවිධානාත්මක අපරාධකරුවන් 06 දෙනෙකු සෘජුවම සම්බන්ධ වී ඇති බවට තොරතුරු අනාවරණය වී ඇති බවත් පොලිසිය සඳහන් කළා.
ගනේ මුල්ල සංජීව ඝාතන සිද්ධියට අදාල නඩුකරය අද කොළඹ ප්‍රධාන මහේස්ත්‍රාත් අසංග එස් බෝදරගම මහතා ඉදිරියේ කැඳවූ අවස්ථාවේදී එම කොට්ඨාශයේ නිලධාරියා මේ බව අනාවරණය කර සිටියා.
මෙම නඩුව අද කැඳවූ අවස්ථාවේදී බූස්ස බන්ධනාගාරයේ රදවා සිටින සැකකරුවන් පස් දෙනෙකු සූම් තාක්ෂණය ඔස්සේ අධිකරණයට ඉදිරිපත් කර තිබුණා.
ඊට අමතරව ඉශාරා සෙව්වන්දි නැමැති සැකකාරියට පලායාමට ආධාර අනුබල දුන් බවට සැකපිට රක්ෂිත බන්ධනාගාරගත කර සිටි සැකකරුවන් තුන්දෙනෙකු සහ සැකකාරියන් දෙදෙනෙකු බන්ධනාගාර නිලධාරීන් විසින් අධිකරණයට ඉදිරිපත් කර තිබුණා.
මෙම නඩුකරය අද කැඳවූ අවස්ථාවේදී කොළඹ අපරාධ කොට්ඨාශයේ නිලධාරියා විසින් මෙතෙක් සිදුකළ විමර්ශනවල ප්‍රගතිය දැක්වෙන වැඩිදුර වාර්තාවක් අධිකරණයට ඉදිරිපත් කළා.
එම සිද්ධිය සම්බන්ධයෙන් රක්ෂිත බන්ධනාගාර ගතව සිටින සහ රැඳවුම් භාරයේ සිටින සැකකරුවන් කිහිප දෙනෙකුගෙන් ප්‍රශ්න කර ප්‍රකාශ සටහන් කරගෙන තිබෙන බවත් ඒ ඔස්සේ වැඩිදුර විමර්ශන සිදු කරන බවත් එම නිලධාරියා සඳහන් කළා.
මෙම ඝාතන සැලසුම ක්‍රියාත්මක කිරීම සඳහා ප්‍රබල සංවිධානාත්මක අපරාධකරුවන් 09 දෙනෙකු සම්බන්ධ වී ඇති බවට තොරතුරු ලැබී ඇතැයි සඳහන් කළ පොලිසිය ඉන් 04 දෙනකු රඳවා තබා විමර්ශන සිදු කරන බවත් සඳහන් කළා.
තවත් සැකකරුවකු වෙනත් අපරාධයක් සදහා පෑලියගොඩ විමර්ශන ඒකකය මගින් අත්අඩංගුවට ගෙන රක්ෂිත බන්ධනාගාර ගතකර සිටින අතර ඔවුන් මීළඟ දින අධිකරණයට ඉදිරිපත් කිරීම සඳහා නියෝගයක් නිකුත් කරන ලෙසත් ඔහු අධිකරණයෙන් ඉල්ලා සිටියා.
මේ අතර රැඳවුම් භාරයේ පසුවන සැකකරුවන් නිරීක්ෂණය කිරීම කොටුව මහේස්ත්‍රාත්වරයා විසින් සිදු කරන බව සඳහන් කළ එම නිලධාරියා එම සැකකරුවන් සම්බන්ධයෙන් සිදු කරන විමර්ශනවල ප්‍රගතිය කොටුව මහේස්ත්‍රාත් අධිකරණයට සහ කොළඹ මහේස්ත්‍රාත් අධිකරණයේ අංක 08 මහේස්ත්‍රාත්වරයාට වාර්තා කරන බවත් සඳහන් කළා.
ඉදිරිපත් වූ කරුණු සලකා බැලූ මහේස්ත්‍රාත්වරයා මේ වන විට රිමාන්ඩ් භාරයේ පසුවන සැකකරුවන් තවදුරටත් ලබන 21 වනදා දක්වා තවදුරටත් රක්ෂිත බන්ධනාගාර ගත කරන ලෙස නියම කළා.
ඊට අමතරව විදේශ වලට පලා ගොස් සිටින සැකකරුවන් වහාම අත්අඩංගුවට ගෙන අධිකරණයට ඉදිරිපත් කරන ලෙසත් මහේස්ත්‍රාත්වරයා විසින් වැඩි දුරටත් පොලිසියට නියෝග කර සිටියා.