පැතුම් නිශ්ශංකගේ අර්ධ ශතකය සමඟ ඉනිමට සාර්ථක ආරම්භයක් ලැබුණද ලකුණු 10ක් තුළ කඩුලු 4ක් බිඳ වැටීමෙන් ජයග්‍රහණය ඈතට යද්දී සටන්කාමී නිමාවක් එක් කරමින් සිම්බාබ්වේ පිලට එරෙහිව ඊයේ පැවති පළමු විස්සයි20 තරගයෙන් ශ්‍රී ලංකාවට ජය හිමිකර දීමට කමිඳු මෙන්ඩිස් සහ දුෂාන් හේමන්ත සමත් වූහ.
මේ සමඟ තරග 3කින් සමන්විත විස්සයි20 තරගාවලිය 1-0ක් ලෙස පෙරමුණ ගැනීමට ද ශ්‍රී ලංකා ක්‍රීඩකයෝ සමත් වූහ.
මේ තරගයේ කාසියේ වාසිය දිනාගත් ශ්‍රී ලංකා පිල පළමුව පන්දුවට පහර දීමට සිම්බාබ්වේ පිලට අවස්ථාව දෙමින් ඉනිම ලකුණු 175කට සීමා කළ අතර, ජයග්‍රාහී ඉලක්කය පන්දු 5ක් ඉතිරිව තිබියදී සපුරා ගත්තේ කඩුලු 6ක් දැවී තිබියදීය.
පැතුම් නිශ්ශංක සහ කුසල් මෙන්ඩිස් පන්දු 62කදී ලකුණු 96ක් රැස් කරමින් ශ්‍රී ලංකා පිළිතුරු ඉනිමට වේගවත් ආරම්භයක් දුන්හ.
පැතුම් නිශ්ශංක
කෙසේ වෙතත් ඔවුන් දෙදෙනා ද සමඟ කඩුලු 4ක් ලකුණු 10ක් තුළ දවා ගනිමින් තරගය තම කණ්ඩායම දෙසට හරවා ගැනීමට සිම්බාබ්වේ පන්දු යවන්නෝ සමත් වූහ. පන්දු 32කදී හතරේ පහර 4ක් සහ හයේ පහර 2ක් සමඟ ලකුණු 55ක් රැස් කළ පැතුම් පළමු කඩුල්ල ලෙස දැවී ගිය අතර, කුසල් (ජනිත් හා මෙන්ඩිස්) යුගලය එක ඕවරයකදී දවා ගැනීමට රිචඩ් න්ගරාවා සමත් විය. පෙරේරා ලකුණු 4ක් සහ මෙන්ඩිස් පන්දු 35කින් ලකුණු 38ක් රැස් කළ අතර, නායක චරිත් අසලංකගේ ඉනිම එක් ලකුණකට සීමා විය. නුවනිඳු ප්‍රනාන්දු ලකුණු 7කටත්, දසුන් ශානක ලකුණු 6කටත් දැවී ගිය අතර, සිම්බාබ්වේ පිල දෙසට හැරී තිබූ තරගය යළි තම කණ්ඩායම දෙසට ඇද ගැනීමට කමිඳු මෙන්ඩිස්ට හැකි විය. පන්දු 16කදී හතරේ පහරක් සහ හයේ පහර 4ක් සමඟ නොදැවී ලකුණු 41ක් රැස් කළ කමිඳුට සිය මංගල විස්සයි20 ඉනිමෙන් සාර්ථක සහායක් දුන් දුෂාන් හේමන්ත පන්දු 9කින් නොදැවී ලකුණු 14ක් රැස් කළේය. දෙදෙනා එක්ව 7 වැනි කඩුල්ලට පන්දු 14කින් ලකුණු 35ක් එක් කරමින් ශ්‍රී ලංකා ජය තහවුරු කළහ. තරගයේ වීරයා සම්මානය කමිඳු මෙන්ඩිස්ට හිමි විය.
පළමුව පන්දුවට පහර දුන් සිම්බාබ්වේ ඉනිමට සාර්ථක ආරම්භයක් දුන් බ්‍රයන් බෙනට් සිය 5 වැනි විස්සයි20 අර්ධ ශතකය ලෙස ලකුණු 81ක් රැස් කළේය. දෙවැනි කඩුල්ලට ෂෝන් විලියම්ස් (14) සමඟ පන්දු 21කින් ලකුණු 37ක් එක් කළ බෙනට් තෙවැනි කඩුල්ලට සිකන්දර් රාසා (28) සමඟ එක්ව ගොඩනැඟූ සබඳතාව පන්දු 40කින් ලකුණු 51කි.
දුෂ්මන්ත චමීර සහ මහීෂ් තීක්ෂණ පිළිවෙළින් පළමු සහ දෙවැනි කඩුලු බිඳ දැමූ අතර, ලකුණු 28ක් ලබා සිටි රාසා පිටියෙන් ඉවත් කිරීමට දුෂාන් හේමන්ත සමත් වූයේ මංගල විස්සයි20 කඩුල්ල සටහන් කරමිනි.
අනතුරුව ඉනිමේ සාර්ථකම සබඳතාව ගොඩනැඟීමට බෙනට් සමඟ එක්වූ රයන් බර්ල් සමත් විය. ඔවුන් දෙදෙනා පන්දු 35කින් ලකුණු 51ක් එක් කර තිබියදී දුෂ්මන්ත චමීර ක්‍රියාත්මක කළ ඉනිමේ 19 වැනි ඕවරයේ තෙවැනි සහ හය වැනි පන්දුවලින් දැවී ගියහ. බෙනට් පන්දු 57කදී හතරේ පහර 12ක් එල්ල කළ අතර, බර්ල් පන්දු 15කින් ලකුණු 17ක් රැස් කළේය.
නුවන් තුෂාර ක්‍රියාත්මක කළ ඉනිමේ අවසන් ඕවරයේදී පිට පිට පන්දු 2කින් කඩුලු 2ක් බිඳ වැටුණු අතර, කඩුලු 7කට ලකුණු 175ක් ලෙස ඉනිම නිමා විය. පන්දු යැවීමේදී දුෂ්මන්ත චමීර කඩුලු 3ක් බිඳ දැමූ අතර, දුෂාන් හේමන්ත, මහීෂ් තීක්ෂණ සහ නුවන් තුෂාර කඩුල්ල බැගින් දවා ගත්හ. ඊයේ තරගයේදී දුෂාන් හේමන්තට විස්සයි20 ජාත්‍යන්තර තරග වරම් හිමි විය.
දෙපිල අතර දෙවැනි විස්සයි20 තරගය අනිද්දා (6) හරාරේදීම පැවැත්වේ.
ලකුණු සාරාංශය
සිම්බාබ්වේ – 175/7යි. (ඕවර 20) බ්‍රයන් බෙනට් 81, සිකන්දර් රාසා 28, රයන් බර්ල් 17, ෂෝන් විලියම්ස් 14, ටෂිංගා මුසෙකිවා 11 (දුෂ්මන්ත චමීර 30/3, දුෂාන් හේමන්ත 28/1, මහීෂ් තීක්ෂණ 38/1, නුවන් තුෂාර 47/1)
ශ්‍රී ලංකාව – 177/6යි. (ඕවර 19.1) පැතුම් නිශ්ශංක 55, කමිඳු මෙන්ඩිස් නොදැවී 41, කුසල් මෙන්ඩිස් 38, දුෂාන් හේමන්ත නොදැවී 14 (රිචඩ් න්ගරාවා 19/2, සිකන්දර් රාසා 26/1, බ්‍රැඩ් එවන්ස් 30/1, බ්ලෙසින් මුසරබානි 41/1, ටිනොටෙන්ඩා මපෝසා 47/1)