යාපනය ශික්ෂණ රෝහල, යාපනය හෙද විදුහල ඇතුළු උතුරු පළාතේ රෝහල් සහ සෞඛ්ය ආයතන සඳහා රේඛීය අමාත්යාංශය යටතේ මෙන්ම උතුරු පළාත් සභාව යටතේ ද අලුතින් බඳවාගත් සෞඛ්ය කාර්ය සහායක 350 දෙනෙකු සඳහා පත්වීම් ප්රදානය සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස සහ උතුරු පළාත් ආණ්ඩුකාර නාගලිංගම් වේදනායගම් යන මහත්වරුන්ගේ ප්රධානත්වයෙන් හෙට (18) පස්වරුවේ කන්කසන්තුර පාර, තිවියාමහල් (Thiviya mahal) හිදී සිදුකෙරේ.
මෙම පත්වීම් ප්රදානයේ දී රේඛීය අමාත්යාංශය යටතේ බඳවා ගත් සෞඛ්ය කාර්ය සහායක 45 දෙනෙකු යාපනය ශික්ෂණ රෝහල වෙත ද, 5දෙනෙකු යාපනය හෙද විදුහල වෙත ද අනුයුක්ත කිරීමට නියමිත අතර පළාත් සභාව යටතේ බඳවාගත් 300 දෙනෙකු උතුරු පළාතේ අනෙකුත් රෝහල් සහ සෞඛ්ය ආයතන වෙත ද අනුයුක්ත කිරීමට නියමිතය.
මෙරට නිදහස් සෞඛ්ය සේවා පද්ධතියේ ගුණාත්මකභාවය ඉහළ නැංවීම සහ රෝහල් පද්ධතිය වඩාත් කාර්යක්ෂම කිරීම සඳහාත්, රෝහල් පරිපාලනය සහ රෝගී සත්කාරක සේවා බිඳවැටීමකින් තොරව පවත්වාගෙන යාම සඳහාත් වර්තමාන රජය පළාත් සභාද සමඟ ඒකාබද්ධව සැලසුම් සහගත වැඩපිළිවෙලක් ක්රියාවට නංවා ඇත.
ඒ අනුව මානව සම්පත් සංවර්ධන වැඩපිළිවෙල යටතේ, දීර්ඝ කාලයකට පසු සෞඛ්ය කාර්ය සහායක (SKS) ඇතුළු ක්ෂේත්ර කිහිපයක පවතින පුරප්පාඩු කඩිනමින් පිරවීමට පියවර ගනිමින් මීට ප්රථම බස්නාහිර පළාත ඇතුළු දිවයිනේ අනෙකුත් රෝහල් හා සෞඛ්ය ආයතන සඳහා සෞඛ්ය කාර්ය සහායකයන් 1860 සඳහා මේ වනවිටත් පත්වීම් ප්රදානය කර ඇත.
මෑතකදී පවත්වන ලද ව්යුහගත සම්මුඛ පරීක්ෂණ (Structured Interviews) ඉතා සාර්ථක ලෙස නිම කර ඇති සහ කුසලතා මත තේරී පත් වූ අපේක්ෂකයින් හට මෙම පත්වීම් ලිපි ප්රදානය කරනු ලබන අතර මෙම උත්සවය සඳහා පාර්ලිමේන්තු මන්ත්රීවරුන් වන වෛද්ය එස්. ශ්රී බවානන්දරාජා, මයිල්වාගනම් ජෙගදීස්වරන්, වෛද්ය සෙල්ලතම්බි තිලකනාදන් යන මහත්වරු, උතුරු පළාත් ප්රධාන ලේකම්, උතුරු පළාත් සෞඛ්ය සේවා අධ්යක්ෂ ඇතුළු ප්රාදේශීය දේශපාලඥයින් සහ නිලධාරීන් පිරිසක් ද එක්වීමට නියමිතය.
