මෙතෙක් කාලයක් ශ්රී ලාංකික PayPal ගිණුම් “මුදල් යැවීමට පමණක්” (Send Only) සීමා වී තිබූ අතර, එමඟින් පරිශීලකයින්ට විදේශයන්ට ගෙවීම් කිරීමට හැකි වුවද ජාත්යන්තර සේවාදායකයින්ගෙන් මුදල් මෙරටට ලබා ගැනීමට නොහැකි විය. මෙම සීමාව ශ්රී ලාංකික නිදහස් වෘත්තිකයන්ට සහ ව්යාපාරවලට විශාල බාධාවක්ව පැවතුණි. මෙම සේවාව පුළුල් කිරීමත් සමඟ අන්තර්ජාලය ඔස්සේ සේවා සපයන සුළු සහ මධ්ය පරිමාණ ව්යාපාරිකයින්ට තම ඉපයීම් සෘජුවම මෙරට බැංකු ගිණුම් වෙත ලබා ගැනීමට හැකි වන අතර, එමඟින් රටට ලැබෙන නිල විදේශ විනිමය ප්රමාණය ද ඉහළ යනු ඇත.
වසර දොළහකට අධික කාලයක් තිස්සේ පැවති සාකච්ඡා, ප්රමාදයන් සහ අඛණ්ඩ උත්සාහයන් රැසකින් අනතුරුව ළඟා කර ගත් මෙම ප්රගතිය ශ්රී ලංකාවේ ඩිජිටල් ආර්ථිකය, නිදහස් වෘත්තික (Freelancer) ප්රජාව, තොරතුරු තාක්ෂණ ක්ෂේත්රය, ආරම්භක ව්යාපාර (Startups), සුළු සහ මධ්ය පරිමාණ ව්යාපාර, අපනයනකරුවන් සහ ඊ-වාණිජ්ය (e-commerce) ආශ්රිත කර්මාන්ත ආදිය සඳහා සුවිශේෂී පරිවර්තනීය පියවරක් ලෙස හැඳින්විය හැකිය.
මෙම සහයෝගීතාව අනුව, ආරම්භයක් ලෙස, ලංකා බැංකුව (BOC), කොමර්ෂල් බැංකුව සහ සම්පත් බැංකුව යන බැංකු මගින් PayPal සේවා මෙරට තුළ ක්රියාත්මක වනු ඇති අතර, ඉදිරි කාලයේදී අනෙකුත් බැංකුද මේ සමඟ එක්වනු ඇත.
1998දී කැලිෆෝනියාවේ ආරම්භ කරන ලද PayPal ආයතනය ලොව විශාලතම ඩිජිටල් ගෙවීම් වේදිකාවලින් එකක් වන අතර, එය රටවල් 200කට අධික සංඛ්යාවක පරිශීලකයින් මිලියන 430කට වඩා වැඩි පිරිසකට සේවා සපයමින් වාර්ෂිකව ඇමරිකානු ඩොලර් ට්රිලියන 1.5කට වඩා වැඩි ගනුදෙනු ප්රමාණයක් සිදු කරයි. එය ගෝලීය නිදහස් වෘත්තික වේදිකාවල මෙන්ම ඊ-වාණිජ්ය වේදිකාවලද බහුලව භාවිත වේ.
මෙරට ඩිජිටල් ආර්ථිකයක් සඳහා වන න්යාය පත්රයේ ප්රමුඛ කරුණු වන සියලු දෙනා ඇතුළත් කරගත් ආර්ථිකයක් ඇති කිරීම, ඩිජිටල් ව්යවසායකත්වය දිරිමත් කිරීම සහ ජාත්යන්තර වෙළෙඳපොළ සමඟ සම්බන්ධතාව ශක්තිමත් කිරීම ආදී අරමුණු ළඟා කර ගැනීම සඳහා මෙම සහයෝගිතාව ඉතා වැදගත් වනු ඇත.
දේශසීමා අතර ගෙවීම් සේවා පුළුල් කිරීම හේතුවෙන් මෙරට කුඩා ව්යාපාර සහ ව්යවසායකයින්ට ගෝලීය වෙළෙඳ කටයුතු සඳහා වඩාත් සක්රීයව දායක වීමට අවස්ථාවක් ලැබෙනු ඇත.
මෙම සේවාවන් ලබා ගන්නා ආකාරය පිළිබඳ වැඩිදුර තොරතුරු අදාළ බැංකු විසින් ඉදිරියේදී සිය පාරිභෝගිකයන් දැනුවත් කරනු ඇති අතර, වැඩිදුර තොරතුරු අවශ්ය පුද්ගලයන්ට හෝ ව්යාපාරිකයන්ට තමන් ගනුදෙනු කරන බැංකුව සෘජුවම සම්බන්ධ කරගෙන ඒ පිළිබඳ තොරතුරු විමසිය හැකිය.
මෙහිදී අදහස් දැක්වූ අග්රාමාත්ය ආචාර්ය හරිනි අමරසූරිය මහත්මිය පෙන්වා දුන්නේ වත්මන් රජයේ ආර්ථික වර්ධන සැලැස්ම සාධාරණත්වය, විනිවිදභාවය සහ වගවීම යන මූලික ප්රතිපත්ති වටා ගොඩනැඟී තිබෙන බවත් එහිදී මෙම ඩිජිටල් පරිවර්තනය සුවිශේෂී අංගයක් බවත්ය.
මෙම සහයෝගීතාව අප සියලු දෙනා බලාපොරොත්තු වන ප්රතිලාභ උදා කර දෙනු ඇතැයි විශ්වාසය පළ කළ අග්රාමාත්යවරිය ආර්ථික ස්ථායීතාව ඇති කිරීමට සහ ඔරොත්තු දීමේ හැකියාව වර්ධනය කිරීමට පමණක් නොව, අනෙක් අයව අනුගමනය කරන්නෙක් පමණක් නොවී, අපටම අනන්ය හැකියාවලින් යුතු ශක්තිමත් සහ විශ්වාසදායී රටක් ලෙස කලාපීය සහ ගෝලීය වශයෙන් ස්ථානගත කිරීමටද මෙය ඉවහල් වනු ඇතැයි ප්රාර්ථනා කරන බව පැවසුවාය.
මෙහිදී වැඩිදුරටත් අදහස් දැක් වූ අග්රාමාත්ය ආචාර්ය හරිනි අමරසූරිය
මෙය සැබැවින්ම අනුස්මරණීය මොහොතක්. ඩිජිටල් ආර්ථිකයේදී ශ්රී ලංකාවේ භූමිකාව ජාත්යන්තර ඇගයීමට ලක්වෙමින් පවතින බව මෙන්ම කලාපීය මෙන්ම ගෝලීය වශයෙන්ද ස්ථාවරභාවයක් ගොඩනගා ගැනීමට හැකි වී ඇති බව මෙයින් සනාථ වෙනවා. ශ්රී ලංකාවේ ඩිජිටල් ආර්ථිකය වෙනුවෙන් අපට ඉහළ ඉලක්ක පවතිනවා. ඉදිරියේදී මෙය ආර්ථික වර්ධනය සඳහා ඉවහල් වන ක්ෂේත්රයක් මෙන්ම රැකියා උත්පාදනය සඳහා මූලාශ්රයක් වනු ඇතැයි අපේක්ෂා කරනවා.
මෙම ක්ෂේත්රය තුළ ඉතා දක්ෂ නිදහස් වෘත්තිකයන් (Freelancers) රැසක් අප සතුව සිටිනවා. විනිවිදභාවයෙන් යුත් සහ සුරක්ෂිත මූල්ය සේවා පද්ධතියක් ස්ථාපිත කිරීම, උපායමාර්ගිකව මෙන්ම මෙම ක්ෂේත්රය තුළ අපගේ අනන්යතාව තහවුරු කර ගැනීමටද ඉතාම වැදගත්. සුළු සහ මධ්ය පරිමාණ ව්යවසාය (SME), මාර්ගගත සේවා, ඊ-වාණිජ්යය (E-commerce) සහ ඩිජිටල් ආර්ථිකය යන මේ සියල්ලම එකිනෙකට සමීපව බැඳී තිබෙනවා. ඉදිරි මාස සහ වසර කිහිපය තුළදී වඩාත් ආකර්ෂණීය නව අවස්ථා උත්පාදනය කරතැයි අපේක්ෂා කළ හැකි, ශීඝ්රයෙන් ව්යාප්ත වන ක්ෂේත්රයක් ලෙස මම මෙය දකිනවා.
එසේම, මාර්ගගත සේවා සහ ගෙවීම් වඩාත් ආරක්ෂිත, නීත්යානුකූල සහ වගකීම් සහගත පද්ධතියක් යටතට පත්වීම ඉතාම වැදගත් බව මම විශ්වාස කරනවා. වංචනික ක්රියා, අනාරක්ෂිත පද්ධති සහ සැක සහිත ගනුදෙනු පිළිබඳව ගෝලීය වශයෙන් උද්ගත වන තත්ත්වයන් අප දැක තිබෙනවා.
එනිසා අප ඉදිරියට යන විට, වගවීම සහ ආරක්ෂාව සහතික කරන, ගෝලීය වශයෙන් පිළිගත් සහ අනෙකුත් සේවා සමඟ ඒකාබද්ධ වූ වේදිකාවක් ස්ථාපිත කිරීම අත්යවශ්ය කරුණක්.
අප ඩිජිටල් ආර්ථිකය, සුළු සහ මධ්ය පරිමාණ ව්යවසාය අංශය සහ ඊ වාණිජ්යය යන ක්ෂේත්ර පුළුල් ලෙස වර්ධනය කළ හැකි විභවතා සහිත ක්ෂේත්ර ලෙස සලකනවා. අපේ ආර්ථික වර්ධන සැලැස්ම මූලික ප්රතිපත්ති දෙකක් වටා ගොඩනැඟී තිබෙනවා. එනම්, සාධාරණත්වය, විනිවිදභාවය සහ වගවීමයි.
සුළු සහ මධ්ය පරිමාණ ව්යවසාය අංශය පුළුල් කිරීම, නිදහස් වෘත්තිකයන්ට අතහිත දීම, ඊ- වාණිජ්යය වර්ධනය කිරීම සහ ඩිජිටල් ආර්ථිකය ශක්තිමත් කිරීම ආදිය ගැන සිතන විට, අපේ රට දීර්ඝ කාලයක සිට මුහුණ දී ඇති ගැටලු වන සමාජ අසාධාරණත්වය, ආර්ථික අසමානතාව සහ සංවර්ධනයේ පවතින දැඩි විෂමතාවලටද විසඳුම් සෙවිය යුතු වෙනවා. අපේ සංවර්ධනය සැමටම ප්රතිලාභ ලැබෙන, සාධාරණ මෙන්ම සමාජීය වශයෙන් වගකීම් සහගත එකක් විය යුතුයි.
මෙම පරිවර්තනය සඳහා උනන්දුවෙන් දායක වන අපේ තරුණ පරපුර, ශ්රී ලංකාවේ අනාගත සංවර්ධනය තුළ එම වටිනාකම් නිරූපණය කිරීමට නායකත්වය දෙනු ඇතැයි මම බලාපොරොත්තු වෙනවා.
මෙම සහයෝගීතාව අප සියලු දෙනා බලාපොරොත්තු වන ප්රතිලාභ උදා කර දෙනු ඇතැයි මම විශ්වාස කරනවා. අපේ ආර්ථිකය ස්ථායී කිරීමට සහ ඔරොත්තු දීමේ හැකියාව වර්ධනය කිරීමට පමණක් නොව, අනෙක් අයව අනුගමනය කරන්නෙක් පමණක් නොවී, අපටම අනන්ය හැකියාවලින් යුතු ශක්තිමත් සහ විශ්වාසදායී රටක් ලෙස කලාපීය සහ ගෝලීය වශයෙන් ස්ථානගත කිරීමටද මෙය ඉවහල් වනු ඇතැයි මම ප්රාර්ථනා කරනවා.
ඩිජිටල් ආර්ථික නියෝජ්ය අමාත්ය එරංග වීරරත්න මහතා
දක්ෂ පුද්ගලයින්, ගෝලීය වශයෙන් තරගකාරී නිෂ්පාදන සහ අනාගතය පිළිබඳ සුබදායී බලාපොරොත්තු තිබියදී පවා දශක ගණනාවක් තිස්සේ විශ්වාසදායක, සරල සහ කාර්යක්ෂම ගෙවීම් පද්ධතියක් හඳුන්වා දීමට නොහැකි වුණා. ලොවටම සේවාවන් සපයන ව්යවසායකයින්, නිදහස් වෘත්තිකයින් (Freelancers) සහ අපනයනකරුවන් අප සතුව ඉන්නවා. ඔවුන්ට සහාය වීමට හෝ ඔවුන්ගේ ගෙවීම් කාර්යක්ෂමව ලබා ගැනීමට අවශ්ය නිසි පහසුකම් අප සතුව තිබුණේ නැහැ. ජනාධිපති ලේකම් කාර්යාලය, ඩිජිටල් ආර්ථික අමාත්යාංශය, මුදල් අමාත්යාංශය ඇතුළු සියලුම පාර්ශ්වකරුවන්ගේ දැඩි කැපවීම හේතුවෙන් ශ්රී ලාංකිකයන්ට අත්යවශ්යව තිබූ මෙම ඩිජිටල් ගෙවීම් වේදිකාව ඔවුන්ට විවෘත කර දීමට දැන් අපට හැකි වී තිබෙනවා.
මෙමගින් ශ්රී ලාංකිකයන්ට විදේශයන්ගෙන් ගෙවීම් ලබා ගැනීම පහසු කරනවා පමණක් නොවේ. ලොව පුරා සිටින සේවාලාභීන්ට ශ්රී ලංකාව සමඟ ව්යාපාර කටයුතු කිරීමද වඩාත් පහසු කරවනවා.
විශ්වාසදායක සහ කාර්යක්ෂම ගෙවීම් පද්ධති නොමැතිකම නිසා වසර ගණනාවක් තිස්සේ බොහෝ පිරිස් අවධිමත් සහ නීති විරෝධී (Grey-market) ක්රමවේද වෙත යොමු වුණා. මෙයින් පෙනෙන්නේ සැලකිය යුතු මුදලක් ශ්රී ලංකාවේ විධිමත් මූල්ය පද්ධතියට කිසිදා ඇතුළත් නොවූ බවයි. වත්මන් තක්සේරුවලට අනුව, ශ්රී ලංකාවේ ඩිජිටල් අපනයන ප්රමාණය ඇමරිකානු ඩොලර් බිලියන 1.5 ක් පමණ වුවත්, විධිමත් මාර්ග හරහා ගෙවීම් ලබා ගැනීමට නොහැකි වීම හේතුවෙන් මෙහි විශාල සෙවනැලි කර්මාන්තයක්ද (Shadow industry) පැවතුණා.
මෙම බාධක ඉවත් කර නිවැරදි මාර්ගයෙන් ව්යාපාර කිරීම පහසු කිරීමට වත්මන් රජය කැප වී සිටිනවා. අපේ ඩිජිටල් පරිවර්තන න්යාය පත්රයේ කොටසක් ලෙස ඩිජිටල් මුදල් (Digital currencies) සහ අතථ්ය වත්කම් (Virtual assets) සඳහා නියාමන රාමු හඳුන්වා දීමටද අප කටයුතු කරමින් සිටිනවා.
වැඩි වැඩියෙන් තරුණ ව්යවසායකයින්, නිදහස් වෘත්තිකයන් සහ සුළු සහ මධ්ය පරිමාණ ව්යවසායකයන් අපනයන කටයුතු සහ ඩිජිටල් ආර්ථිකය සඳහා දායක කර ගැනීමට අපට අවශ්යයි. මෙම උපායමාර්ගයේ කොටසක් ලෙස මෑතකදී අපි ඩිජිටල් සංචාරක වීසා ක්රමයද හඳුන්වා දුන්නා. අප සැලසුම් කරන්නේ 2030 වන විට ඇමරිකානු ඩොලර් බිලියන 15ක ඩිජිටල් ආර්ථිකයක් ගොඩනැගීමට සහ ඩිජිටල් ආර්ථිකයේ දායකත්වය දළ දේශීය නිෂ්පාදිතයෙන් (GDP) 20% දක්වා වැඩි කිරීමටයි. ගරු ජනාධිපතිතුමාගේ මගපෙන්වීම යටතේ ඩිජිටල් ආර්ථික අමාත්යාංශය අනෙකුත් සියලුම හවුල්කාර අමාත්යාංශ සහ පාර්ශ්වකරුවන් සමඟ එක්ව මෙම පරිවර්තනය සඳහා නායකත්වය දෙමින් සිටිනවා.
ජනාධිපති ලේකම් ආචාර්ය නන්දික සනත් කුමානායක මහතා
ඩිජිටල් ආර්ථිකය පුළුල් කිරීම නව රජයේ සුවිශේෂී වෑයමක්. අද දින ආරම්භ කරන මේ කර්තව්යය ඒ සඳහා විශාල පිටිවහලක් වනු ඇතැයි අපි බලාපොරොත්තු වෙනවා.
මෙවැනි මුදල් ගනුදෙනු පහසු කිරීමේ කාරකයක් ලංකාවට ගෙන්වීමට පසුගිය වසර දහය, දොළහ තිස්සේ සාකච්ඡා පවත්වා තිබෙනවා. එහිදී කිසියම් බාධා මතුව තිබුණා. එහෙත් ජනාධිපති කාර්යාලය ලෙස අපි මූලිකත්වය අරගෙන සෘජුවම ඉන්දියාවේ PayPal ආයතනයේ නියෝජිතයන් සමඟ සාකච්ඡා කළා. එහි ප්රතිඵලයක් ලෙස අද ලංකාවට මේ PayPal පහසුකම හඳුන්වා දීමට හැකි වී තිබෙනවා. මේ පිළිබඳ පර්යේෂණ සහ සංවර්ධන වාණිජ්යකරණ ජාතික ප්රවේශයේ ආචාර්ය මුදිත සෙනරත් යාපා මහත්මයාට විශේෂ ස්තූතිය පිරිනැමිය යුතුයි. මහබැංකුව වගේම මූල්ය ක්ෂේත්රයේ සියලු දෙනාගේ දායකත්වයෙන් අපිට අද මෙම කටයුත්ත සාර්ථක කර ගැනීමට හැකි වුණා.
විශේෂයෙන් ක්ෂුද්ර, සුළු සහ මධ්ය පරිමාණ ව්යාපාරිකයන්ට ඒ වගේම තාක්ෂණ ක්ෂේත්රයේ කටයුතු කරන පිරිස් වෙත මෙම ක්රියාවලිය ඉතා පහසුවක් වනු ඇති. ඒ වගේම PayPal කියන්නේ අපේ රට ආර්ථිකය ප්රසාරණය කිරීමට කාලීන අවශ්යතාවක්. එම අවශ්යතාව අද දවසේ ඉෂ්ට වීම සතුටට කරුණක්. මේ ලැබෙන පහසුකම මගින් තම ව්යාපාර දියුණු කර ගන්න කියලා මම තරුණ ව්යවසායකයින්ට ආරාධනා කරනවා.
ශ්රී ලංකා මහ බැංකුවේ අධිපති ආචාර්ය නන්දලාල් වීරසිංහ මහතා
වසර ගණනාවකට පෙර සිංගප්පූරුවේ පැවති FinTech උළෙලෙහිදී මා ප්රථම වරට PayPal හි ප්රධාන විධායක නිලධාරීවරයා (CEO) සමඟ මේ පිළිබඳව සාකච්ඡා කළා. ඒ අවස්ථාවේදී ශ්රී ලංකාව ශක්යතා සහිත ව්යාපාරික අවස්ථාවක් ලෙස ඔවුන් දුටුවේ නැහැ. ඒත් අද වන විට PayPal ආයතනය ශ්රී ලංකාවේ විභවය හඳුනා ගෙන තිබීම පිළිබඳව මට සතුටුයි.
මෙය ශ්රී ලංකාවේ ඩිජිටල්කරණ ගමනේ වැදගත් පියවරක්. සුළු සහ මධ්ය පරිමාණ ව්යවසායකයන් මෙන්ම බැංකු ක්ෂේත්රයද ජයග්රහණය කරවන (Win-Win) තත්ත්වයක්. වර්තමාන ලෝකයේ ව්යාපාරිකයන් සහ වෘත්තිකයන් භූගෝලීය සීමාවන්ට පමණක් කොටු වී නැතත්, ශ්රී ලංකාවේ නිදහස් වෘත්තිකයන්, ව්යවසායකයන් සහ අපනයනකරුවන් මුහුණ දුන් විශාලතම අභියෝගයක් වූයේ ජාත්යන්තර ගෙවීම් කාර්යක්ෂමව ලබා ගැනීමේ අපහසුවයි.
PayPal හි ඉන්දියාව සහ දකුණු ආසියාව පිළිබඳ සංස්ථාපිත කටයුතු අධ්යක්ෂ
නාත් පරමේෂ්වරන් (Nath Parameshwaran) මහතා
ශ්රී ලංකාවට මෙන්ම PayPal ආයතනයටද එක සේ වැදගත් වන මෙම ඓතිහාසික අවස්ථාවට අද දින සහභාගී වීමට ලැබීම භාග්යයක් ලෙස සලකනවා. අද දින සිදු කළ මෙම නිවේදනය මගින් රජය, මූල්ය ආයතන, මූල්ය නියාමන ආයතන සහ ක්ෂේත්රයේ අනෙකුත් හවුල්කරුවන් අතර පවතින ශක්තිමත් සහයෝගීතාව මැනවින් නිරූපණය වෙනවා.
මෙම අවස්ථාව සාර්ථක කර ගැනීම සඳහා නායකත්වය, මගපෙන්වීම සහ සහයෝගය ලබා දීම පිළිබඳව ශ්රී ලංකා රජය, ජනාධිපති කාර්යාලය, මහ බැංකුව, ඩිජිටල් ආර්ථික අමාත්යාංශය සහ මුදල් අමාත්යාංශය වෙත අපගේ බලවත් කෘතඥතාව පළ කර සිටිනවා.
‘2030 ඩිජිටල් ආර්ථික දැක්ම’ යනු සියලු දෙනා ඇතුළත් (Inclusive) ආර්ථික වර්ධනයක් කරා ගමන් කිරීම සඳහා තාක්ෂණයේ සහ ඩිජිටල් සම්බන්ධතාවේ ඇති විභවය මැනවින් හඳුනාගත්, අනාගතයට ගැළපෙන ඉහළ ඉලක්ක සහිත න්යාය පත්රයක්. මෙහිදී විශේෂයෙන්ම කැපී පෙනෙන්නේ, ඩිජිටල් පරිවර්තනයේ ප්රතිලාභ රට පුරා සිටින කුඩා ව්යාපාර, නිදහස් වෘත්තිකයන් සහ ව්යවසායකයන් වෙත ළඟා කර දීම කෙරෙහි දක්වා ඇති අවධානයයි.
කුඩා ව්යාපාර සහ නිදහස් වෘත්තිකයන් ශ්රී ලංකා ආර්ථිකයේ පදනම බඳුයි. වඩාත් සම්බන්ධිත සහ සියල්ලන් ඇතුළත් වන ඩිජිටල් ආර්ථිකයක් නිර්මාණය කිරීම සඳහා රජය දක්වන කැපවීම අප බෙහෙවින් අගය කරනවා. මෙය පසුගිය මාස කිහිපය පුරා සියලුම පාර්ශ්වකරුවන් දැඩි කැපවීමෙන් යුතුව සිදු කළ සැබෑ හවුල්කාරිත්වයක ප්රතිඵලයක්. PayPal ආයතනය පැත්තෙන් බැලුවොත්, මෙම සහයෝගීතාව අඛණ්ඩව ඉදිරියට ගෙන යාමටත්, ශ්රී ලංකා ආර්ථිකයෙහි වර්ධනය සඳහා දායක වෙමින් වගකිවයුතු භූමිකාවක් ඉටු කිරීමටත් අපි මහත් උනන්දුවෙන් සිටිනවා.
PayPal හි ජාත්යන්තර දේශසීමා අතර වෙළෙඳාම පිළිබඳ ජ්යෙෂ්ඨ උප සභාපති සහ ආසියා පැසිෆික් කලාපීය සාමාන්යාධිකාරී නාඩියා සයීඩ් (Nadia Syed) මහත්මිය
මෙම වැදගත් අවස්ථාවේ කොටස්කරුවෙකු වීමට ලැබීම භාග්යයක් කර සලකන අතරම, ශ්රී ලංකාව තුළ ඩිජිටල් ආර්ථිකයක් සඳහා වූ පොදු දැක්මක් වටා රාජ්ය සහ පෞද්ගලික අංශයේ හවුල්කරුවන් එක්රැස් කිරීමට කටයුතු කරමින් සිටීම පිළිබඳව අපි ශ්රී ලංකා රජයට අපගේ කෘතඥතාව පළ කරනවා.
PayPal ආයතනය ලෙස අපගේ අරමුණ වී ඇත්තේ සැමවිටම කුඩා ව්යාපාර, නිදහස් වෘත්තිකයන් (Freelancers), ව්යවසායකයන් සහ පාරිභෝගිකයන් හට ගෝලීය ආර්ථිකයට ප්රවේශ වීම සඳහා ශක්තිය ලබා දීමයි. වෙළෙඳපොළ 200කට වඩා වැඩි ප්රමාණයක පවතින සක්රීය ගිණුම් මිලියන 439ක් සමගින්, වාණිජ කටයුතු වඩාත් සරල, ආරක්ෂිත සහ පහසුවෙන් ප්රවේශ විය හැකි එකක් බවට පත් කිරීමට අපි කැප වී සිටිනවා.
ලොව පුරා සිටින පාරිභෝගිකයින්ට දැනටමත් සේවාවන් සපයන, ශක්තිමත් සහ හැකියාවන් සහිත නිදහස් වෘත්තිකයන්, ව්යවසායකයන්, අපනයනකරුවන් සහ ආරම්භක ව්යාපාර (Startups) ප්රජාවක් ශ්රී ලංකාව සතු බව අපට පෙනී ගියා.
ඔවුන්ගේ විභවතා ගෝලීය මට්ටමේ ඒවා වන අතරම, ඔවුන්ට ඇති අවස්ථාද විශාලයි. ලංකා බැංකුව, කොමර්ෂල් බැංකුව සහ සම්පත් බැංකුව සමඟ එක්ව, ශ්රී ලංකාවේ PayPal පරිශීලකයන් සහ ව්යාපාර සඳහා වඩාත් ප්රවේශ විය හැකි දේශසීමා අතර ගෙවීම් සේවාවක් ලබා දීම සඳහා අපි වැදගත් පියවරක් තබමින් සිටිනවා. ශ්රී ලංකාවේ පුළුල් ඩිජිටල් ආර්ථික අරමුණු ළඟා කර ගැනීම සඳහා සහාය වීමට අපගේ බැංකු හවුල්කරුවන් සමඟ එක්ව මෙම ගමන අඛණ්ඩව ඉදිරියට ගෙන යාමට අපි බලාපොරොත්තු වෙනවා.
ලංකා බැංකුවේ සාමාන්යාධිකාරි, වැඩබලන ප්රධාන විධායක නිලධාරි
වයි. ඒ. ජයතිලක මහතා
අපි මිලියන 16කට අධික පාරිභෝගිකයන් පිරිසකට ලංකාව තුළ ඩිජිටල් සේවා සපයනවා. එහිදී ප්රධාන වශයෙන් මාර්ගගත තාක්ෂණය ඔස්සේ විදේශ රටවලට නිදහස් සේවා සපයන තරුණ පරම්පරාව වෙනුවෙන් Smart Freelancer නමින් අපි අලුත් සේවාවක් පටන් ගත්තා. ඒ වගේම, ඔවුන් වෙනුවෙන් E- Creator නමින් ඉතාමත් අඩු පොලී අනුපාතිකයක් යටතේ වෙනම ණය යෝජනා ක්රමයක් හඳුන්වා දුන්නා. ඒ වගේම විදේශ රටවල සිට ලංකාවට විදේශ ප්රේෂණ එවන අයට smart remit app හඳුන්වා දුන්නා. මේ සියල්ල අතර තිබුණු හොඳ ගෙවීම් මාධ්යයක අඩුව පුරවන්න PayPalවලට හැකියාව ලැබෙන බව අපේ විශ්වාසයයි. ලංකාවේ සිටින නිදහස් සේවා සැපයුම්කරුවන්ගෙන් 150,000ක් පමණ පිරිස ලංකා බැංකුවේ ගනුදෙනුකරුවෝ. ඔවුන්ගේ විදේශ රටවල ඉපැයීම් හෝ වෙනත් දීමනා ලෙස ලැබෙන විදේශ ප්රේෂණ මෙරටට වඩාත් කාර්යක්ෂමව සහ සුරක්ෂිතව ගෙන්වා ගැනීමට PayPal වැනි මාධ්යයක අවශ්යතාව දැඩිව තිබුණා. ඒ සඳහා ශ්රී ලංකා මහා බැංකුව ගත් උත්සාහය පිළිබඳව ලංකා බැංකුව ලෙස අපි ස්තූතිවන්ත වෙනවා.
කොමර්ෂල් බැංකුවේ කළමනාකාර අධ්යක්ෂ සහ ප්රධාන විධායක නිලධාරී
සනත් මනතුංග මහතා
PayPal ක්රමය, මුදල් ආපසු ලබා දීමේ ක්රමය, නැත්නම් withdrawal facility හඳුන්වා දීම ඩිජිටල්කරණයේ වැදගත් සන්ධිස්ථානයක්. PayPal යනු ගෙවීමේ ක්රමයක් හඳුන්වාදීමක් පමණක් නෙවෙයි. එය මෙරට ව්යාපාරික ප්රජාවට, ජාත්යන්තර ගනුදෙනු කරන ඩිජිටල් ස්වාධීන වෘත්තිකයන්ට, ඩිජිටල් ආර්ථිකයට වඩාත් පහසුවෙන් ළඟා වීමට සහසම්බන්ධ වීමට ලැබෙන ඉතාම තීරණාත්මක අවස්ථාවක්. ශ්රී ලංකාවේ ආර්ථිකයට ඉතාමත් ධනාත්මක සංවර්ධනයක් ඩිජිටල් ස්වාධීන වෘත්තිකයන්ගෙන් ලැබෙනවා. ලෝකය පුරා ඩිජිටල් ස්වාධීන වෘත්තිකයන් තම දක්ෂතාව, නිර්මාණශීලීත්වය, දුරස්ථ සේවා ලබා දීම, තොරතුරු තාක්ෂණවේදය තුළ ශීඝ්රයෙන් රැකියා උත්පාදනය වෙනවා. ඔවුන්ට කාලයක් තිස්සේ නිල සහ පහසු විදේශ මුදල් ලැබීමේ පහසුකමක් නොතිබීම විශාල බාධාවක් වුණා. PayPal ක්රමය හඳුන්වා දීමත් සමඟ මේ ගැටලුව නිරාකරණය වෙනවා. මෙමගින් මෙරටට විදේශ විනිමය ගලා ඒම ශක්තිමත් වෙනවා, ශ්රී ලංකාවේ ආර්ථිකයට ස්වාධීන වෘත්තිකයන්ගෙන් ලැබෙන දායකත්වයට නිසි වටිනාකමක් ලැබෙනවා.
සම්පත් බැංකුවේ කළමනාකාර අධ්යක්ෂ සංජය ප්රදීප් ගුණවර්ධන මහතා
අප වසර ගණනාවක් තිස්සේ මහත් පරිශ්රමයකින් ඇති කර ගත් සම්බන්ධතාවක් මල්ඵල ගැනීමක් හැටියටයි මේ අවස්ථාව දකින්නේ. PayPal ක්රමය හඳුන්වාදීම අපි දකින්නේ තවත් ගෙවීම් පහසුකමක් තාක්ෂණික විසඳුමක් හඳුන්වාදීමක් පමණක් ලෙස නෙවෙයි, ලංකාව ගෝලීය ඩිජිටල් ආර්ථිකයක් සමග වඩාත් සම්බන්ධ කරන, රටේ ජනතාවට සහ ව්යාපාරික ප්රජාවට නව අවස්ථාවක් විවෘත කරන,ඉතා වැදගත් ඉදිරි පියවරක් ලෙසයි. අද ලෝකය ඉතා වේගයෙන් වෙනස් වෙමින් පවතිනවා. ඩිජිටල් ගෙවීම්, Fintech නවෝත්පාදන සහ දේශසීමා ඔස්සේ සිදු වන මූල්ය සම්බන්ධතා ලෝක ආර්ථිකයේ ප්රධාන බලවේග බවට පත්වී තිබෙනවා. ඒවා තවදුරටත් සහායක සේවාවන් පමණක් නොවේ. ගෝලීය ආර්ථික වර්ධනය, අපනයන ව්යාපෘති, ව්යවසායකත්වය, රැකියා අවස්ථා සහ රටක තරගකාරීත්වය තීරණය කරන ප්රධාන සාධක බවට පත්වෙනවා.
කර්මාන්ත සහ ව්යවසායකත්ව සංවර්ධන අමාත්ය සුනිල් හදුන්නෙත්ති, කම්කරු අමාත්ය සහ මුදල් හා ක්රමසම්පාදන නියෝජ්ය අමාත්ය ආචාර්ය අනිල් ජයන්ත ප්රනාන්දු, කර්මාන්ත සහ ව්යවසායකත්ව සංවර්ධන නියෝජ්ය අමාත්ය චතුරංග අබේසිංහ, විද්යාව සහ තාක්ෂණය පිළිබඳ ජනාධිපති ජ්යෙෂ්ඨ උපදේශක ගෝමික උඩුගමසූරිය, ඩිජිටල් ආර්ථිකය පිළිබඳ ජනාධිපති උපදේශක හාන්ස් විජේසූරිය, පර්යේෂණ සහ සංවර්ධන වාණිජ්යකරණ ජාතික ප්රවේශයේ අධ්යක්ෂ ජනරාල් ආචාර්ය මුදිත සෙනරත් යාපා යන මහත්වරු සහ අමාත්යාංශ ලේකම්වරුද, මූල්ය ආයතන ප්රධානීහු, රාජ්ය නිලධාරීහු, කර්මාන්තකරුවෝ, ව්යවසායකයෝ සහ බැංකු ප්රධානීහු ඇතුළු පිරිසක්ද මෙම අවස්ථාවට එක්ව සිටියහ.
